我试过靠自己戒毒，但系愈嚟愈严重，成个人都沉沦咗。

有一日，我忽然谂起我有一位神。我向神讲：「神啊，你系唔系真系存在？如果你真系神，你可唔可以帮我戒掉呢啲坏习惯？我真系好痛苦。」

讲完之后，我都冇咩期望，继续吸毒，过住一个破碎、沉沦嘅生活。

直到2019年2月，我终于鼓起勇气搵妈妈，我话：「妈，我需要人帮我。」我好惊，好惊佢会闹我、打我，甚至赶我出屋企。

但佢冇咁做，佢一句话都冇讲，就行过嚟揽住我，温柔咁话：「阿仔，唔该你愿意同我讲。你放心，我会搵人帮你。」

我喺嗰刻真系忍唔住喊出嚟。我知道，呢个唔只系妈妈嘅拥抱，更系天父藉住佢话畀我听：「我一直都喺你身边。」

2019年5月21日，我去到牧者福音戒毒中心，开始咗人生新一页。喺嗰度，我接受训练，学习做人，有正常嘅作息，生活开始有秩序。

我重新认识自己，认识神，认识点样做一个负责任、尊重自己同人嘅人。神一步一步咁重建我，医治我。

到咗2021年10月，我完成咗两年半嘅课程。嗰一日，我领到证书，心入面充满感恩。我知，系神亲自带我走过低谷，带我走到今日。

2023年6月，神呼召我做全职童工，喺NewLife PJ 中文堂服侍祂。能够用自己曾经破碎嘅生命去祝福其他人，帮助更多人走出黑暗，我感到无比荣幸。

同年，神又为我预备咗我人生嘅伴侣。我哋喺2024年2月24日正式註册结婚，并会喺5月举行婚礼。呢段婚姻系神所赐，系祂恩典嘅一部分。

我想话：上帝，从来冇离开过我。

从我七岁开始认识佢，到我人生跌到最低谷，神一直冇放弃我，佢一路喺我生命度撒种子、陪伴我。

而家我回转归向神，佢继续祝福我、带领我。

我曾经迷失，但而家被寻回。曾经破碎，而家完全得医治。

荣耀归畀嗰位从来冇放弃我嘅天父！